Абстракция

Абстракция
(немесе төрттағандар)

***
Қару тұр қасқайып...
Тіл қатып өткен шақ ізінен.
Ағарған шаштардың азабын оқыдым
Қанжардың қылпыған жүзінен.

***
Жарқылы жаныңды қақ тілген
Ғашықтық – сол дерттің жарасы.
Мен білсем, екеуі тамырлас, тым жақын
Қыз бенен қылыштың арасы.

***
Жұпары жаныңды ерітіп
Тандырған естен бір...
Махаббат бұл енді шыңырау
немесе ол кәдімгі...
Семсердің жүзіне өскен гүл.

***
Қыркүйек...
Қайтқан құс сорабы
Менің де кеп еді ұмтылғым,
Тостаққа тұндырып ұсынды құдаша
Бір жұтым аққудың сұңқылын.

***
Түнімен түс көрдім
Анамның дауысын таныдым.
Таңертең сол түстің...
Көзімнен көрпеге төгілген
Тауып алдым мамығын.