دەگۋمانيزاسيا

دەگۋمانيزاسيا

كەرمەك اقىل كىمگە كەرەك،
بىلەسىز...
ءتۇپتىڭ ءتۇبى – قورلانۋ.
ءبىر عاجايىپ شاريعات بار الەمدە –
بەلدەن تومەن ويلانۋ.

شىن شاريعات وسى عانا
مەن بىلسەم،
ءباسى بيىك باسقادان.
ادامزاتتا ايات ەكەۋ تابىنار –
جىنىس مۇشە،
اسقازان...

كەستەلى ءسوز،
كەمەڭگەر بوپ كورىنۋ
مۇنىڭ ءبارى بەر جاعى.
قوي، قۇرىسىن...
ءسوز قىلماي-اق قويالىق
ءجۇزىمىزدىڭ ار جاعىن.

بەس سەزىمنەن بيىكتەسەك كورىنەر
اۋىزى بار قولدىڭ دا،
جۇپارى بار،
توزاڭى بار تۇشكىرتەر
جالعىز تامشى ويدىڭ دا.

شىن ماحاببات، گۇل مەيىرىم، ار-ۇيات
بۇلار نەتكەن ۇلى ءسوز.
مۇز بەتىنە گۇل قاۋلايدى
ول راس
تامىپ كەتسە جىلى ءسوز...