مانترا

مانترا
«شىندىق دۇنيەگە جالاڭاش كۇيىندە كەلگەن جوق،
نىشاندار مەن بەينەلەر ارقىلى كەلدى.
ول، ونى باسقاشا ەش ۇيرەتە المايدى».

ەسكى ەۆانگەليە جازباسىنان

وسىلاي سويلەسەم...
ۇرۋعا شوقپارىڭ،
كومۋگە دايىن دا شىعار كۇرەگىڭ،
كاپىر دەيسىڭدەر،
ازعىن دەيسىڭدەر بىلەمىن.
وسىناۋ كوتەرەم ويىڭدى
سوڭعى دەم كەۋدەمنەن شىققانشا،
قايتەيىن...
ايالاپ، ارقالاپ،
امال جوق، جۇرەمىن.
جولىمنان بىلاي تۇر...
تالقانىڭ بىتكەنشە
قىزىل ءتان شىداي تۇر.
ول راس...
ساقالى ساپسيعان ەسكى اقىل ءبارىن دە قيراتتى،
كۇيرەتتى...
...كەۋدەگە ءوتىڭىز
ءجۇز ون ءتورت سۇرەنى جۇرەكتە بۇرلەتىپ،
قانىڭدا گۇلدەتىپ
قابىرعاڭ استىندا قۇداي تۇر.
كەي ۋاق...
كەۋدەم ءبىر لاپىلداپ جانادى،
ويىمدا مىڭ ساۋال
وزەندەي اعادى.
«شىن قۇداي – ءسوز» دەيدى
ىشتەگى ءبىر سىڭعىر، –
«جاراتقان – جازۋدان تامعان نۇر»
سول عانا وزگەرتىپ،
سول عانا كوگەرتپەك ساناڭدى...»
دەپ قالقىپ تۇرادى ماناعى.
سىڭعىر مەن سيمۆولدار –
ءتاۋ ەتەر قاعبام،
مەن سونىڭ زاڭىنا باعىنام.
سانانىڭ اعىسى –
ءمىناجات مەكەنىم،
بەس مارتە ماڭىنان تابىلام.
ءبارىنىڭ ۇستىنەن شىعانداپ قارايتىن
شىڭىراۋ، تىم شەكسىز
ءبىر بيىك مەجەنى ساعىنام.
...تاعدىر كىلت ۇزىلسە،
اق اجال – سىيلىعىم،
وزىمە كوشەدى
ەندىگى بيلىگىم.
سول كۇنى...
بارشانى ورنىنان تۇرعىزعان
جانازا نامازىم –
بالكىم،
قۇلدىقتان قۇتقارعان
...سوڭعى گيمنىم.