ون ءبىر بۋىن ومىرتقاڭ كەتسىن سىنىپ...

ون ءبىر بۋىن ومىرتقاڭ كەتسىن سىنىپ...
(تولەۋجان ىسمايىلوۆ)
ەركىن ولەڭ

I
الاپات ويلاردىڭ اياعىن قىسقارتىپ
ۇيقاسقا سالاتىن
قۇتقار قۇلدىقتان،
ەركىن وي.
بۇل – شايىردىڭ ءمىناجات دۇعاسى،
سوراسى...
زارى...
ءوڭى نارتتاي كۇرەڭ
تامىردان ورەكپىپ
اسپانعا شاپشىعان
اساۋ وي –
بەينەبىر بۇلا
كەنەسارىنىڭ قانى.

II

راس...
ونەر – جانكەشتىلىك،
بوگدە ءبىر ماقامعا ەلتىپ
اۋليە حالىنە جەتۋ.
ەي، ەركىن وي،
عۇمىر – ءسۇتپىسىرىم...
ءولىم – ءتۇپسانا
باcتاپقى بەلدەۋگە ءوتۋ.
شىندىق –
سيمۆول مەن تاڭبا
ءمانىسىن جۇرەكپەن توقۋ.
عازال –
كۇن شاپاعىنان تامعان
سول «جازۋدىڭ»
عاجايىپ ءتاپسىرىن وقۋ.








III

راۋشان گ ۇلىن كوز جاسىمەن سۋارىپ
قىزعالداقتى قارىنداس،
ايدىڭ نۇرىن القا تۇتار ىزگىلىك
ەي، ەركىن ولەڭ...
ءار ارپىڭنەن ءاتىر اڭقىپ،
تۇلا بويىڭ تۇنعان سەنىڭ مەيىرىم،
بولسا، شىركىن تاعى...
جەتى سارىننىڭ
جەلدەگى ءانى.
سوسىن...
دەمىنەن دۇنيە ورتەنىپ كەتەردەي
ءتۇسى قاردان دا اپپاق،
مۇزدان دا ءمولدىر
ءشاھيت...
شاكارىم قاجىنىڭ
جالعىز-اق تامشى ارى.


IV

ەي، ەركىن وي،
تاڭعا جاقىن توڭازىعان گۇلدەردىڭ
انتەك قانا ءدىرىلىن،
قۇس جولىنىڭ سىڭعىرىن،
قاسيەتتى قارا جەردىڭ كۇبىرىن
سەزىنە الساق...
بۇدان وزگە
قاجەت تە ەمەس بوتەن وي
(بۇل دارگەيدىڭ بيىگىنە تالاپتانسا جەتەدى وي).
ال...
ولەڭ دەگەن – ءتاڭىر ءتىلىن تاپسىرلەۋ...
قالعىپ كەتكەن كوبەلەكتىڭ نەمەسە
ءوزى ۇمىتىپ
ەش ەسىنە تۇسپەگەن
كورگەن ءتۇسىن
كوپكە جورۋ ەكەن عوي...