تانىم

تانىم
بۇرىن شىن بار بۇگىن شىن،
I ەرتەڭ شىن بار ءۇش بولەك.
كەرەگى جوق بۇلاردىڭ،
بۇزىلمايتىن شىن كەرەك.
(شاكارىم)

«مۇرتتى قۇداي»، «مۇرتسىز قۇداي»، «كۇن قۇداي»،
مىناۋ ەلگە نە بوپ كەتكەن قۇرعىر-اي؟
ءپاني دۇنيە – پەرعاۋىندار مەكەنى،
قايداسىڭ سەن...
راحىمدى شىن قۇداي؟

اقىل ايتقىش اعالار-اي، اعالار،
اۋىزىنا شومىلدارعان كۇن-ايدى.
قىزىل تىلمەن اللا ەسىمىن ايعىزداپ،
الداماڭىز قۇدايدى.

توپاس تانىم جارىعى جوق ءتۇن دەسە...
تۇرعىنىمىز سول تۇرمەنىڭ ەندەشە.
ءتورت اياقتى جانۋار عوي ادامزات،
ءتورت كوز تۇگەل كورمەسە.


II

جان تۇنشىعىپ، ءتان ەسىردى، ال بۇگىن،
ايتىڭىزشى، «اقجۇرەك» كىم، ارلى كىم؟
پايعامباردىڭ رۋحىنا بويالعان،
سەنەسىز بە، حالدە* جاتىر بار عىلىم.

اتتەڭ، شىركىن، عاپىلدىعىم كەمىستىك،
كەمىستىكتى نۇرمەن جۋساق تەك ىستىق...
كوكىرەكتەن كوز اشىلىپ سول مەزەت
جان تىلىنە كوشەر مە ەدى كەڭىستىك.

جاراتقاننىڭ جامالىنان نۇر تۇسسە،
وتەر ەدىك ءبىر پىشىنەن ءبىر تۇسكە.
پەرىشتەدەن ادام اسقاق اۋەلدەن
ادام بيىك رۋحىمەن تىلدەسسە.

ادام اسقاق، وعان جالا جاپپاڭىز،
ەسسىزدىك دەپ، بالكىم، مۇنى داتتارسىز.
جاننىڭ سىرى جاسىرىلعان جۇرەككە
جارقىرايدى ول، ەگەر كىلتىن تاپساڭىز.

سول كەزدە ادام رۋحى مەن ۇجدانى،
جاراتقانعا جاقىنداتار تۇلعاڭدى...
مىنە، ءبىزدىڭ جەتە الماعان ورەمىز،
مىنە، ءبىزدىڭ باباتانىم جۇمباعى.

جىن جۇلمالاپ، سايتان سارىپ ەسىمدى،
ادامدىقتان اداستىردى -اۋ كوشىمدى.
ءبىر اشىلماي بىزدەن دە ءوتىپ بارادى،
توبەدەگى ءتورت تانىمنىڭ* ەسىگى.


ءحال – جۇرەك ءىلىمى
ءتورت تانىم – شاريعات، تاريحات، اقيقات، ماعريپات