تەرىسبۇراۋ

تەرىسبۇراۋ
وي تۇبىندە جاتقان ءسوز
شەر تولقىتسا شىعادى.
(اسان قايعى)
تاعى دا تورىعۋ،
تاعى دا الدانۋ،
قارىننىڭ قامى ءۇشىن،
قوعامعا جالدانۋ.
ەس-تۇسسىز جالدانۋ
بىرەۋگە كوڭىلدى،
ال ونىڭ سەبەبىن سۇراما،
بۇل ءوزى بىتپەيتىن قايعىلى،
قايعىلى ساياسي دراما.

اينالام – الاياق،
ءتانىم – مۇز، جانىم – ءورت،
سايقالدىڭ سايراۋى-اي
شۇيدەسىن ويناتىپ.
مەن سودان سىمىرەم
اپ-اششى زاھاردى
ال قىزىل قانىمنىڭ
وتىنا قايناتىپ.

قازاقى عۇرىپتىڭ
قاينارىن ىزدەدىم،
و، ۇلتتىق ۇجدانىم،
وي، اپپاق نامىسىم،
بارمىسىڭ بىلمەدىم.
ار-يمان، ۇياتىم،
ءولدىڭ سەن، ول راس،
سەن ءولدىڭ، تاعىلىم،
حوش، حوش، حوش قايتەيىن،
«وي، باۋىر-ە-ە-م، باۋىرىم».

قورلاعان قوعامعا
الدانعان ارىڭ مەن
شاينالعان وبالدىڭ
جاراسى جازىلار.
كۇنى ەرتەڭ ءفانيدىڭ
تالقانى تاۋسىلىپ،
ەكىنشى تىنىستىڭ
ەسىگى قاعىلار.


قوس ءومىر – ەكى جول –
ءقابىردىڭ ۇستىندە،
بىرەۋى قارا جەر ىشىندە.
ۇستىندە بىتىسپەس مەشكەيلەر سوعىسى
سوعىستىڭ ماقساتى تىم ىستىق.
بىرىندە – جانسەبىل
قىپ- قىزىل القىنىس،
بىرىندە – ءموپ-مولدىر تىنىشتىق.

تاريحىم مىڭ ۇزىك،
تاعدىرىم مىڭ باتپان،
تاعدىرعا نە دەيىن،
تاريحىم جىلاتقان.
اناۋ ءبىر عاسىردا
بۇرىمى ج ۇلىنىپ،
ت ۇلىمى كەسىلگەن،
شىڭعىرعان شىندىعىم
شىعادى قاي جاقتان؟!

شىرىلداپ شىققان جان،
شاشىراپ اققان قان
كرەمل تورىنە جەتىپتى.
و، ءتاۋبا، قۇدىرەت!
مىڭ جىلعى مۇراتىم،
جانشىلعان رۋحىم
شوقشا باس، شوت ماڭداي
شال بولىپ كەتىپتى.

شالدار-اي، شالدار-اي،
ادىلەت سۇرايمىن سەندەردەن
قارا جۇرت حالىقتىڭ زارىمەن
جۇرەكتى مازداتىپ تاعى مەن.
قابىلدىڭ ەسىمىن قاشانعى قاشايسىز
ءابىلدىڭ قىپ- قىزىل قانىمەن…