انا

انا

سول مەزەتتە...
سەن دە كەتتىڭ، مەن دە ءولدىم،
تەڭ جارتىسىن جەرگە كومدىم دەنەمنىڭ.
سودان بەرى سەڭ سوققانداي ساندالىپ،
جارتى جانمەن ءومىر ءسۇرىپ كەلەمىن.
انا–بالا ماحابباتىن كوردەگى،
قايدان سەزسىن
كوكىرەكسىز كوز مۇنى؟
جەرگە تۇسكەن جارتى جاڭقام شىمىرلاپ،
الاس ۇرىپ
مەنى ىزدەيدى كەي كۇنى.
الاس ۇرىپ قۇشاعىندا دالانىڭ
كۇنىن كۇيتتەپ، قامىن جەيدى بالانىڭ.
كوردە جاتىپ
سەنى ويلايدى
و، توبا...
قۇدىرەتى-اي،
ماحابباتى-اي
انانىڭ.
قۇرساق-عۇمىر قاننان سۇتكە الماسىپ،
ءپاني –باقي
ءبىر ۇيلەسىم تاڭداسىپ.
انا–بالا...
كىندىگىمەن دامىلداپ
جاتادى ەكەن
ەكى دۇنيە جالعاسىپ.


***

جاسقا شىلاپ
نە مارقايتىپ مىڭ كوزدى،
بابام تارتقان
باعىتتى ۇستاپ ءبىر كەزگى.
اياق استى اسپان جاققا اتتانسام،
ايتا الماسپىن
بۇل ءسوزدى.

«ەسىل ەر-اي قانداي ەدى ولەڭدە
بۇيتە المادىق،
سۇيتە المادىق» دەگەندە...
جانى تازا
جان اڭعارار سول مەزەت
بارماق شىعىپ تۇرعاندىعىن توبەدە

...سۇق ساۋساقتىڭ ورتاسىنان كەزەلىپ.


























***
جەل كوتەرگەن
جاپىراقتىڭ سىبدىرىن،
اي شايقاعان
ايدىڭ كولدىڭ تۇنىعىن.
قوس سەزىمگە
قوسارلادىم ءبىر سۋرەت
شىققا مالىپ...
شەگىرتكەنىڭ شىرىلىن

***

قۇرساق – جۇماق،
قۇرلىق – توزاق،
بالالىق قوي جاقىنىڭ.
سەزەر ەدىڭ سول ەكەۋىن
كىرگەن كەزدە اقىلىڭ.


***
ءوڭىم دە، ءتۇسىم دە
قۇدايلىق ۇمسىنىپ پىشىنگە.
قاۋىزىن جارادى ءبىر ويىم
قاعازدىڭ ىشىندە.


***
جەر مەن اسپان بىرىگەدى ءبىر كۇندە
بولعان سولاي ىلكىدە.
قاۋىشادى عاشىقتارداي دۇنيە
سىڭعىر دەمدەپ كۇلكىگە.
جۇمىر دۇنيە جانۇشىرىپ جاتقاندا
كۇمبەزىنەن راحىم نۇرىن اسىرىپ
...اي مەن كىرەس قوسىلۋى مۇمكىن بە؟!












***
تۇرعانداي قيامەت تۋىپ...
ياپىراي،
شاڭقوبىز ءۇنى نەدەگەن سۋىق
...مىڭ جىل
تالىقسىپ جەتكەن جۇلدىزدىڭ
جارىعىن اكەپ
جىبەرگەندەي بولادى
توبەڭە قۇيىپ.


***

مەن ولەڭ جازعان كەزدە...
اق قاعازدىڭ گۇل قاۋلايدى بەتىنە.
كوبەلەكتەر پىرلايدى ونىڭ وتىندە.

مەن ولەڭ جازعان كەزدە...
جەتى جۇماقتى كورەم.
جالبىز بۇركىپ تۇرادى بۇكىل دەنەم.

مەن ولەڭ جازعان كەزدە...
بويىم بۇلتتان دا وتەدى
كۇمپ بەرسەم ىشىنە... كوك اسپان ورتەنىپ كەتەدى.

بەتىمە كىم كەلىپ
داتىمە كىم شىدار بۇل ماڭدا
اللادان «ايات» اپ تۇرعاندا...