تۋعان كۇن تۋرالى ءان

تۋعان كۇن تۋرالى ءان

«...ءبىر مينۋت ءبىر كىسىنىڭ ومىرىنە ۇقساس،
ءوتتى، ءولدى، تاعدىر جوق قايتا كەلمەك»
(اباي)

قايدا كەتتىڭ ءۇزىلىپ تاۋسىنشاق كۇن
تۇسىنبەيدى-اۋ تاعدىردىڭ نارقىن ادام.
...تۇسىنەرىم،
كۇرسىدەن جازىلعان حات
جىل اۋناسا جىلجيدى جارتى قادام...

احاۋ...
اسپان تەڭىز،
ادام قايىق،
مۇعالاق،
دۇنيە عايىپ.
احاۋ، ال...
اجالدى اتاپ وتەيىك
داستارحان جايىپ...

قايدا كەتتىڭ قارا شاش قايشى وتپەيتىن
قالاي ءتۇستى بىلمەدىم قار باسىما.
بوزاڭ تارتقان بۇل ساماي سول جازۋدىڭ
بۇرىن جەتكەن بۇيرىق تاڭباسى ما؟

احاۋ...
اسپان تەڭىز،
ادام قايىق،
مۇعالاق،
دۇنيە عايىپ.
احاۋ، ال...
اجالدى اتاپ وتەيىك
داستارحان جايىپ...