وزگەرىس

وزگەرىس

(وزگەرىس شەرىكباي ۇلىنا)

ەكپىنى تاۋ تەڭسەلتەر
الاپات دىبىستى
«كومەيگە بۇقتىرىپ
ىرا كوتەرگەن».
ول ءان سالسا،
تامىرعا شوق ءتۇسىپ
جاي ويناپ كەتەدى
جاپ-جاسىل شەكەڭنەن.

قىمىزداي ساپىرىپ
ءار اۋەن سورابىن،
سان جەلپىپ
جۇرەكتىڭ سامالىن.
سۋ بەتىن جالاعان
قايماقتاس ءتارىزدى قالقىتىپ،
شالقىتىپ
شىركىن...
سالادى-اق سابازىڭ!

ول ءان سالسا،
كورگەندەي بولاسىڭ
كوردەگى اناڭدى،
كومىلگەن اتاڭدى.
كومەيدەن جامىراپ
اۋاعا جايىلعان داۋىستا
بوز ۇيلەر بۇلدىراپ،
شۇرقىراپ
جىلقىلار جاتادى.

اي، اڭىراپ كەتكەندە
اكەڭ تىرىلگەندەي
اناڭ ءبىر ومىراۋ ەمىزگەندەي
كۇيدە بولاسىڭ...
بىلەسىڭ پايىمىن كيەنىڭ،
ديدارىن ۇعاسىڭ يەنىڭ.
سول شاقتا...
ارۋاناداي ءيسىنىپ،
ايرانداي ۇيىعان اۋەزدىڭ
تۇبىنەن سىزدىقتاي
تامشىلاپ تۇرادى سۇيەگىڭ.

ول
كۇندەي كۇركىرەپ كەتكەندە
ءبىر بوساپ ىرقىنان
بيىكتەپ قارايدى
دۇنيە سىرتىنان.
جاسقانىپ
جىن-پەرى،
قۇل-قۇتان
جەرگە ەنىپ كەتەدى،
القارا اسپاندى قاق تىلگەن
نايزاعاي داۋىستىڭ
جۇزىنەن قىلپىعان...