ايىراۋىق

ايىراۋىق

I
ىڭىراندى قوبىز
سۇتتەي شىمىرلاعان ۇنگە
سۇڭگىدىم دە كەتتىم.
كۇندەي كۇركىرەگەن ويدىڭ
كومبەسىنە جەتتىم.

وي ءىشى كەڭىستىك ەكەن ––
باعزى ءبىر ادامدار كوشى.
اسپاننان اعادى وزەن
اۋادا...
كوبەلەك ءيسى.

بۇل جەردىڭ كۇنى دە باسقا
شاتتىعى، مۇڭى دا بوتەن.
توعايدان توگىلگەن ۇنگە
توپىراق جىلىنادى ەكەن.

ەكى ىشەك بۇرق ەتتى
ورتتەن،
قانداي شەر جاندىردى ەكەن.
قوس قىلدان قۇلاعان دىبىس،
قازاقتىڭ
تاعدىرى ما ەكەن.

سول دىبىس تاتىسا كەرمەك
كۇي دەگەن
وسى عوي دەڭىز.
...شاناقتا شايقالعان اۋەن
بەينە ءبىر تولقىعان تەڭىز.













II

قۇسار پەرنە بەتىنەن ءدۇر ەتكەن اۋەن
جانىما تاستادى كەيىس.
كەۋدەمدى شارپىعان ءورتى
«قيامەت» بولۋعا ءتيىس.

ەكى ىشەك بەتىنەن قالقىپ
سۋسىلداپ تومەنگە تارتتى.
دەمىنىڭ لەبىنەن...
دۇنيە شۇرقىراپ جاتتى.

جامىراپ مىڭ جۇپارى
شىمىرلاي جۇرەككە تۇندى.
ءار ماقام بۇتاعىندا
ماۋەلى...
گۇل اتىپ تۇردى.

سوڭعى ساز
قاڭق ەتتى قازداي
شاناقتان قۇيىلىپ جاڭا.
اۋەدەن قۇلادى تومەن
ءبىر شوكىم ۇيىعان اۋا.

قوس ىشەك
ءپاني مەن باحي
ۋىلدەپ قۇشاعىن اشتى
كورمەدىك نەلىكتەن كۇيدىڭ
كوزىنەن بۇرق ەتكەن جاستى.