مەتەوريتتەر

مەتەوريتتەر

كۇرەتامىردان اققان قىزىل قان
اۋەلەي ۇشىپ بۋعا اينالدى.
جاس ارۋدىڭ قىستىققان زارى
اۋاعا ءسىڭىپ،
قۇمعا اينالدى.
ءسىز بىلەسىز عوي...
تاستار – ومىراۋ ءسۇتىن كوككە ساۋعان
انالار شەرىنەن پايدا بولاتىنىن.

وسىناۋ...
تالىققان داۋىس پەن تاۋداي كۇنانى ارقالاپ
اسپان قاشانعى شىدايدى؟
(ءتۇتىلىپ ءتۇبى ءبىر سۇلايدى).
...ومىراۋ سۇتىنەن جارالعان
وباداي-وباداي وسى ءبىر تاستار
كەزەگى كەلگەندە
وق جىلانداي سۋىلداپ
...تۋرا توبەمىزگە قۇلايدى.