ءتۇپسانا

ءتۇپسانا
«...تۇپتەپ كەلگەندە قارا تاستىڭ ءوزى دە كۆانتتىق
دەڭگەيدە بىزبەن ءبىر تەكتەس ەكەندىگى ءمالىم».
(ماكس پلانك)

I

ءبىز...
ءبىر تەكتەن تاراعان بولساق،
وندا مەنىڭ رۋىم،
ۇلتىم دا جوق.
كوك اسپان – اكەشىم،
قارا جەر – ناعاشىم،
كوك مۇحيت – ءقان-سولىم،
قوڭىر اڭ – ىرىسىم.
كادىمگى ءبىر تۋعان،
قارا تاس – تۋىسىم.

وسى ۇعىم ۇشپاققا شىققاندا
تاستىڭ دا تىلەگىن
ادامزات تىڭدايدى،
مىڭجىلدىق مىزعىماس داستۇرلەر
كۇڭسىگەن مارلىداي سەتىنەپ
قالىپقا سىيمايدى.
رۋلىق ءپالساپا
ماڭدايى شىتىناپ
شىركەۋلەر تاس-تالقان قيرايدى.

قارا دا تۇرىڭىز...

II

ءيا، ءبىز تۋىسپىز...
قۋراي وزەگىنەن قۇلاعان ءۋىل
تىم بايىرعى ءۇن.
قىرداعى قىزعالداق –
جۇعىنى ال قىزىل قانىمنىڭ.
...اعايىن ىشىنە قان قاتىپ
الىستاپ كەتكەنىن
كيىكتىڭ كوزىنەن تانىدىم.

قىركۇيەك كەلگەندە
وكسىگى ىشىنە تىعىلىپ
...ۇزايدى جىل قۇسى
وسىناۋ قازداردىڭ قارلىققان ۇنىنەن
تومەنگە سورعالاپ قۇلايدى
قوس اۋىز مىلتىقتىڭ ۇڭعىسى.

بۇلت بايتەرەگىنەن ۇزىلسە جاڭبىر
...بۇل كۇزدىڭ كەزى عوي.
اۋادا شايقالعان قۇس بىتكەن
قوس قاناتى عانا بار دەمەسەڭ،
اۋماعان...
ادامنىڭ ءوزى عوي.

بالكىم...
كىرلەگەن كەۋدەلەر
ەسىنە ءتۇپسانا
ەجەلگى دەرەكتەر ورالسا،
شىمىرلاپ جۇرەگى
قورعاسىن تاسىنداي اۋىرلار.
ءبىز نەگە ءبولىنىپ،
جاۋىعىپ ۇلگەردىك
...ءۇن قاتىڭدارشى، باۋىرلار.