پايعامبار

ادامزاتتىڭ اسىل ءتاجى، پايعامبار
جولىڭ جۇپار بولعاننان سوڭ سىزگە ەردىك،
ارتىڭىزدان اقيقاتتى ايتۋعا،
سىزدەن كەيىن ءۇر جالعانعا ءبىز كەلدىك.

مەن – اقىنمىن، ال سەن بولساڭ – ەلشىسىڭ
شىمشىق ءتىلىڭ شىندىقتى ايتقان شىر-پىرلاپ،
قوعالى كول قوڭىر ولەڭ مەن ەدىم،
اۋىزىمنان اققۋ ۇشقان سۇڭقىلداپ.

ەي، مۇحاممەد، قاسىرەتىمدى سۇراما،
ساق ساناما شىرە سالۋ شاق قالعان،
كوك ءبورىنىڭ كوز جاسىنا يلەنگەن،
رۋحىمدى كوك قاعازدار تاپتاعان

ءجامي جالعان ماڭدايىنا تار بولدىق،
تۋرالىقپەن قاشاعان سوڭ جولدى ءبىز،
توپاستاردىڭ تۇيسىگىمەن ولشەنسەك،
ەي، مۇحاممەد، ەكەۋمىز دە سورلىمىز.

وعان كۋا تاعالانىڭ كىتابى،
سەنىڭ ءتىلىڭ شىندىقتى ايتىپ توقتاعان.
قاناعاتسىز قارىنداردان شىڭعىرعان،
مەنىڭ ءتىلىم تاعدىرلاردى جوقتاعان.

ءاي، پايعامبار، ادىلدىك جوق سودان سوڭ،
تاعدىرىمدى تابىستاعام قالامعا.
ويسىزداردىڭ ويناعىمەن جازىلدى-اۋ،
وبالىمىز ون سەگىز مىڭ عالامعا.